ত্রিপুরাদের ভাষা `কক বরক`এ বঙ্গবন্ধুর ঐতিহাসিক ভাষণ

বিশিষ্ট শিক্ষাবিদ 'বরেন্দ্র লাল ত্রিপুরা' আমেরিকান ইন্টারন্যাশনাল ইউনিভার্সিটি- বাংলাদেশ- এর ইংরেজি বিভাগের সহকারী অধ্যাপক। বঙ্গবন্ধুর আদর্শকে ধারণ করে নিজের কর্মজীবনকে বিস্তার করতে চায় এই জ্ঞানপিপাসু সৈনিক। তিনি শিক্ষা জীবনে ঢাকা বিশ্ববিদ্যালয় থেকে ইংরেজি বিষয়ে স্নাতক (সম্মান) এবং স্নাকোত্তর অর্জন করেন। এরপর উচ্চতর ডিগ্রী লাভের জন্য অষ্ট্রেলিয়াতে যান। সেখানে মোনাশ ইউনিভার্সিটি থেকে TESOL এ মাস্টার্স ডিগ্রী অর্জন করেন এবং পুনরায় ২০০৮ সালে একই বিশ্ববিদ্যালয় থেকে লীডারশিপ এওয়ার্ড স্কলারশিপ নিয়ে এডুকেশন পলিসি ও বাইলিংগুয়াল এডুকেশনে কেরিয়ারের তৃতীয় মাস্টার্স ডিগ্রী অর্জন করেন।

 

বিশেষ ব্যক্তিত্ব ''বরেন্দ্র লাল ত্রিপুরা'' বিশ্ববিদ্যালয়ে অধ্যয়নের সময়কাল থেকে লেখালেখিতে মনোনিবেশ করতেন। সদা হাস্যোজ্জ্বল সুন্দর মনের এই মানুষ খুব বেশী পছন্দ করতেন 'কবিতা' লিখতে। তিনি তাঁর মাতৃভাষা 'কক বরকে'র পাশাপাশি বাংলা ও ইংরেজিতে বেশকিছু উল্লেখযোগ্য গ্রন্থ লিখেছেন।

 

ত্রিপুরা জাতিসত্ত্বার উজ্জ্বল নক্ষত্র ''বরেন্দ্র লাল'' জাতির পিতা ''বঙ্গবন্ধু শেখমুজিবুর রহমান'' এর আদর্শকে ধারণ করার কারণে ৭ই মার্চের ঐতিহাসিক ভাষণকে অনুবাদ করেছেন ত্রিপুরাদের ভাষা 'কক বরক'' দিয়ে। নিম্নে ভাষণটি নিরূপিত হল-

 

“তাবকনি চাইতকমুঙ ফিয়কমানি চাইতকমুঙ,
তাবকনি চাইতকমুঙ য়কমানি চাইতকমুঙ”

 

বঙ্গবন্ধু শেখমুজিবুর রহমাননি খরাংনি ইঁ ককবুমা ওয়ানজুই জাতি-ন খাঃ সুংগই তিসাজাক। ১৮ মিনিট কালক ইঁ ককবুমা-গ বঃ সালকা পাকিস্তাননি ওয়ানজুইরক-ন য়কমুঙনি বাগই জুগাললাইদি হিনয় হায়কজাক।

বঙ্গবন্ধু শেখমুজিবুর রহমাননি ৭ মার্চনি ককবুমা-ন ইউনেস্কো লাইবুমানি দলিল হিনয় য়াচাগই লাজাক। অবন’ য়াচাগই “মেমরি অফ দি ওয়ার্ল্ড রেজিষ্টার” (এমওডাব্লিউ)-গ মুঙ তিসাখা। ইমই বাংলা হাঃনি কাইসাসুচুক দলিল যেবা এমওডাব্লিউগ’ জনমনি তিসাজাগই তনজাকনায়।

ইঁ ককবুমা তুনুইজরা কক ১২ বায় ককসেজাখা। অঃ ককবুমান’ আঙ তলাগ’ ককবরক বায় ককসেখাঃ

“তুনুই আং বাখা দুঃখনি খা:সাজাকমাবায় নকনি জত্তনি সাকাংগ’ বাচাফাইখা। নক জত্ত সিঅ, বুজিঅ; চুঙ জত্ত জীবন রগই চাইতাইলাইজাক- তুনুই ঢাকা, চট্টগ্রাম, রংপুর বায় যশোরনি লামমা চিনি তাখুকরকনি থুইবায় কাচগই তংখা।

তাবক বাংলানি বরকরক ফিয়কজাকনি নাইঅ, থাংঅই তংনি নাইঅ। বঃক বকনি মানথাইরকন মাননি নাইঅ। ইলেকশনঅ নক পুরা খাইয়ই আন’ বাই আওামীলীগন’ ভোট রগই কাপালাই খাইখা নাইকলমুঙন’ (শাসনতন্ত্র) সালামনানি বাগই। খাঃচংমানি, জাতিনি পান্দামা (অধিবেশন) আচকন’, চুঙ নাইকলমুঙ সালাম-ন; অ  নাইকলমুঙবায় চুঙ রাংসিমুং (অর্থনৈতিক), হাঃসিকুরুমুং (রাজনৈতিক), হুকুমুন' ফিয়কমান'। মাতর বিসি ২৩নি লাইবুমা চিনি বরকরকনি থুইবাই লাম চাকর’মানি লাইবুমাসে অংসিঅ।

 

বিসি ২৩নি লাইবুমা বাংলানি বরকনি কুথুই-কাসানি চুরুইমানি লাইবুমাসে, থুয় রমানি খা-খামমাসিংসা লাইবুমাসে। থুংজাকনায়, হিনজাকনায় বরক রকনি কাপমুংনি লাইবুমাসে। ১৯৫২ বিসিঅ চুঙ থুয় মা-রজাক। ১৯৫৪ বিসিঅ চুঙ ইলেকশন’ কাপ্লাই অংগইব’ ক্ষমতাঅ মাআচকজাকয়া। ১৯৫৮ বিসি অ আইয়ুব খান মুকপ্রে কলমুঙ (সামরিক শাসন) সাপ্রাকগই (জারি করে) চুঙন’ গাবুর বানায়ই তনজাক। ১৯৬৬ বিসিঅ চুঙ দফা ৬ নাইমুঙ নাইজাক; অবঃনি বাগই চিনি কাবাঙ তাখুকরকন’ বুথালয় পাইর’জাক। বিসি ১৯৬৯-অ লোকুরকনি জাংগ্রিংমুঙবায় (আন্দোলন বায়) আইয়ুব খান কালায়ই থাংখায় ইয়াহিয়া খান ফান সেয়ই লাখা। বঃ সাখা যে বঃ লোকুরকনি য়াগ’ ফান ফিলয় রনাই। চুঙ অবন’ য়াচাকগই লাজাক।

 

অবঃনি উল’ তামা অংখা, বন’ জত্ত সিঅ।ইয়াহিয়াবায় কক সালাইয়ই চুঙ বন’ ফেব্রুয়ারি ১৫ তারিখ বিসিংঅ জাতিনি নক পান্দাগ’ পান্দামা রিংদি হিনয় হায়কজাক। মাতর বদলক (দল) গরজানি বখ্রক (নেতা) অংগইব’ বঃ আনি কক খানালিয়া; বঃ কক্ খানাখা বদলক গিরানি বখ্রক ভুট্টো সাব-নি। আঙ বানা বাংলানি বদলক গরজানি অজামায়া (বখ্রকয়া); পুরা পাকিস্তাননি বদলক গরজানি অজামাসে। ভুট্টো সাব সাখা মার্চ তালনি পইলা হাতিঅ’ পান্দামা রিংদি হিনয়। বঃ মার্চ তালনি সালমারি (তারিখ) ৩ গ’ পান্দামা রিংখা।

 

আঙ সাখা, তঃফুঙ চুঙ জাতিনি নগপান্দানি (পার্লামেন্টের) পান্দামাগ’ থানাই। আখাই চুঙ গরজা বদলকফুং কাইসাসুক ককসাই (সঠিক) সাখায় অবন’ য়াচাগই লানাই- অবঃ সাইচুঙচুঙ হিনখাইফুং।

 

ভুট্টো সাব ঢাকাগ’ ফাইজাক। বঃ সাগই থাংখা আর’ ককমুঙ সালাইনায়; লামা ফুংজাকয়া। মওলানা নুরানী বাই মুফতি মাহমুদ আখাই সালথাং পাকিস্তাননি আর’ নগপান্দা বদলকনি (পার্লামেটারি দলের) বখ্রকরক ফাইলাইজাক। বক্বায় ককমুঙ সালাইমানি মুচুকমুঙ (উদ্দেশ্য) অংখা সালায়-হিনলায় খাইয়ই নাইকলমুঙ চংলাইনানি। মাতর আঙ বকন’ সাগই রজাক- ৬ দফান’ সালাইনানি মুঙসাঃ অধিকার লোকুরক আন’ রজাকয়া। অব’ লোকুরকনি সম্পদসে।

 

মাতর ভুট্টো কক্ সিকিরিয়ই সাখা। বঃ হিনবা, “ইন’ ফাইয়ই ডাবল জিম্মি অংমানগালাক।“  নগপান্দা দালি রনায় নগ অঙগই পাইন’। পাকিস্তাননি’ খ্রকসারকন’ব’ বঃ সিকিরিয়ই হিনখা যে নগপান্দানি পান্দামাগ’ ফাইখাই থুয় কাচকর'নায়; বখরক সেকগই রনায়- বুথালইসে পাইর'নায় হিনয়। পেশোয়ারনি সিমি-করাচি জরা জাঙগিরিঙমা চেংগই রনায়। দগান কাইসাফুং মা-ফিয়কগালাক।

 

তঃফুঙ সালথাং পাকিস্তাননি কাই ৩৫ খ্রকসা পান্দাগ’ ফাইজাক। মাতর মার্চ তালনি পইলাগ’ ইয়াহিয়া খান নগপান্দানি পান্দা মাথাগই রখা। দোষ রগই তংখা, দোষ রখা বাংলানি বরকন’; দোষ রখা আন’। হিনখা যে আনি খা বুময়ানি বাগইসে,বর’ মুংসাঃ অংলিয়াফঙ!

অব’নি ওল’খায় বাংলানি বরকরক ককথেয়ই (প্রতিবাদ করে) চুরুইজালাইখা। আঙ কাচাঙততক বায় জাঙগিরিঙমা (আন্দোলন) খাইয়ই থানি বাগয়  দাগারমা (হরতাল) রিংখা; লোকুরক্ সাকনি বায় সাক লাম’ নাখলই ফাইবায়খা।

মাতর চুঙ তামা মানখালা! বক্ য়াক বুকচা বরকনি বাসাগ’ সিলাই কক্খা। চিনি য়াগ’ সিলাই করই। মাতর চিনি রাঙবায় চুঙ বকন’ যে সিলাই পাইয়ই রখা ফাতারনি কেবেংনায়রকনি (শত্রুনি) য়াকনি হাঃন’ মাথাংনি বাগই, তুনুই অ সিলাইবায় আনি দোষ করই বরকরকন’সে বুথালদং। আনি দুঃখিয়া লোকুরকন’সে গুলি কক্দং।

 

চুঙ বাংলানি খরক কাবাঙরক্ যে ফুগ’ হাঃনি নাইকলজাকথাইন’ (শাসনভার) য়াচাগই লানি অং এফুগ’ বক্ কলফেনেনায় (ষড়যন্ত্র খাইনায়),  চিনি সাকাগ’ চুপুরুপনায়।

ইয়াহিয়া খান হিনবা, আঙ বঃরঃ মার্চ তালনি ১০ সালমারি-অ টেবিল কিতিং পান্দাগ’ আচকনি নাইজাক্ফং। আঙ  বঃবায় টেলিফোন’ কক্ সালাইজাক। আঙ ব’ন’ সামানি, নুং হাঃনি প্রেসিডেন্ট, ঢাকাগ’ ফাইয়ই নাইফাইদি, আনি মাইকরই লোকুরকন’ বারাই খাইয়ই বুথালই পাইর’দং; মা-রকনি খুরি বুকচা খাইয়ই পাইর’দং।

 

আঙ সাকাঙ সাকাঙ সাগই রজাক- মুঙসাঃ টেবিল কিতিং পান্দা অংগালাক। তামানি টেবিল কিতিং পান্দা? স’ব’নি টেবিল কিতিং পান্দা? যে বরক্ আনি আমানি-বুখুকরকনি খুরি বুকচা খাইয়ই রখা- বকবাই তামানি টেবিল কিতিং পান্দা?

 

৩ সালমারি-অ আঙ পল্টন’  চুবাচু রয়া জাইতি জাঙগিরিঙনায়নি বাগই হায়কখা। আঙ সাগই রখা- অফিস-আদালত, খাজনা, ট্যাক্স বন্ধ খাইয়ই রদি হিনয়। নক অবন’ য়াচাগই লাজাক।

 

আঙ বা চুঙ বায় কক্ সালাইয়াবাদে ইয়াহিয়া খান বরক কাইসাবায় দামবা(৫ ঘনটা) পান্দা খাইয়ই ককবুমা সাখা। অ ককবুমাগ’  বঃ জত্ত দোষ আঙ বায় বাংলানি বরক রকনি বখরগ’ বগই রখা। দসা খাইখা ভুট্টো, মাতর গুলি কগই বুথালখা বাংলানি বরকন’। চুঙ গুলিব’ মাচাগ’, দোষব’ রজাগ’।

 

ইয়াহিয়া সাব নগপান্দামানি পান্দামা রিংখা। মাতর আনি বিমানি অঙখা- পইলাগ’ মুকপ্রে নাইকলমুঙন' (সামরিক আইন) তিসাগই মা-লান’। মুকপ্রেরক ন’ ব্যারাগ’ ফিলয় মা-তিলাংন’। বরক বুথালনায়নি তদন্ত মা-খাইন’। এসুক্খাইসে চুঙ উয়ানসগই নাইন’ পান্দামা-নগনি, পান্দাগ’ আচকনাইদই আচকয়া। ইঁ  নাইমারকন’ (দাবিগুলো) য়াচাকগই লায়াসাক  পান্দামা-নগ’ আচকনানি মুংসা সেপ (সুযোগ) করই। লোকুরক আন’ আরাই  য়াক্চমমা (অধিকার) রজাকয়া। থুয়নি দাগমা তাবকব’ কুমুকয়াখ’। শহীদরকনি থুয় কাফুরুগই ২৫ সাওমারিনি পান্দামা-নগ’ চুঙ বাজকজাগালাক।

 

তাখুকরক, আনি সাকাগ নকনি পাইতকমাদই  তং? আঙ প্রধানমন্ত্রিত্ব নাইয়া, বরকরকনি মানথায়-ন’সে নাইয়। আন’ প্রধান মন্ত্রিগিরিনি লোভ ফুনুগই তিলাংমানজাকয়া; গদানাগ’ ফাঁসিনি বুদুক খাগইব’ তিলাংমানজাকয়া। নক থুয় রগই আন’ ফেনেনায় (ষড়যন্ত্র) মামলানি কারিয়ই তখা। অ সাল’ আঙ ইঁ রেস কোর্স, হারুংমাগ’ (ময়দান) বাচাগই সাজাক, থুইনি সালকন’ আঙ থুইবাই সুঃগই রনায়- নকনি বাখা দই তং? তুনুইব’ আঙ থুয় রগই নকনি  থুয়নি সালক সুঃনি বাগই জুগালজাক।

 

আঙ সাগই রদং- তুনুইনি সিমি কোর্ট- কাচারি, হাই কোর্ট-সুপ্রিম কোর্ট, অফিস-আদালত, সুরুংনায় নগরক (শিক্ষা প্রতিষ্ঠান) সাইমানয়া সাল জরা (অনির্দিষ্ট কাল পর্যন্ত) ফুংজাগই মা-তংন’। কাঃইসা কর্মচারী অফিস’ মা-থাংগালাক- আঙ আদেশ রদং।

 

করই বরকরকনি তংথকয়া (কষ্ট) অংয়াতই রিক্সা চলেন’, ট্রেন চলেন’; আর মুংসা চলেগালাক। ট্রেন চলেন’, মাতর মুকপ্রেরকন’ মা-রাকায়া। রাকাখাই, মুংসাসুক হাময়া অংখায়, অবঃনি বাগই আঙ দায়ী তংগালাক।

 

সেক্রেটারিয়েট, হাই কোর্ট, সুপ্রিম কোর্ট, জজকোর্ট বায় অকবায় সরকারি, গঃসা সরকারি, স্বায়ত্বশাসিত নগমারক (প্রতিষ্ঠান) ফুংজাগই তংন’। বানা সালকা বাংলানি রথায়-তনথায় ব্যাংকরক দাম (ঘন্টা) কাইনুইনি বাগই ফিয়কজাক তংন’। সালকা বাংলানি রাঙ সালথাঙ পাকিস্তান’ মা-তিলাংগালাক। টেলিগ্রাফ-টেলিফোন বাংলা হা বিসিংঅ সিমিসে চলেন’। মাতর সাংবাদিকরক ফাতারনি হায়ুঙমাগ’ ককতুমা (খবর) হলমান’।

 

ইঁ হাঃনি বরকরকন’ বুথালই পাইরদং; নাইয়ই-নুংগই হেমলাইদি। নাংখালাই জত্ত চাক্কা বাথাকর'গই রন’।

নক জরানি মতে বেতন লাগই ফাইদি। গুলি কলসা বঃ ককগ’ হিনখায় বাংলানি নগ’ নগ’ দুর্গ তাকলাইদি। যে নি নগ’ যা তং অব’ বায়, কলফেনেনায় রকন’ ( শত্রুদেরকে) মা-কাস’ন’। লাম-কলরক ফুংগই মা-র’ন’। চুঙ বকন’ মাইবায় বুথালনাই, তৈ-বায় বুথালনাই। হুকুম রঃনি বাগই আঙ তংয়াখায়, আনি সামুঙনি আফাকরক তংয়াখায়, নক চাইতাইলাইয়ই থাংদি।

নক চিনি তাখুকরক; নক ব্যারাগ’ ফিলই থাংদি, কাইসাঃ মুংসা হিনগালাক। গুলি কক্খাই আর’ গাম অংগালাক। কোটিসিনি বরকন’ আর’ সিনয় তনমাগালাক। বাংলানি বরকরক থুইনানি সুরুংখা, বকন’ আর’ কাইসাঃ সিনয় তনমাগালাক।

 

থুয় রনায়রকনি বায় পিয়াক-সিয়াক অংজাকরকনি নুখুঙনি বাগয় আওয়ামীলীগ চুবাচু বুথুপ খাইজাক। চুঙ চুবাচু রঃনি চাইতাইনাই। নক সঃবঃ বাসুক ফারি রগই কালাংদি।
সালস্নিনিনি দাগারমাগ’ যে তাখুকরক য়াক বাজকখা, কারফিউনি বাগই সামুংগ’ নাখলমানলিয়া, শিল্পনি নকফাংরক, বকন’ পুরা বেতন রগই রদি।
সরকারনি তাংকুরুংরকন’ আঙ সাদং- আঙ যা সাঃ অব’ন’ মা-মানেনায়। কাঃইসান’ অফিস’ নুংয়াতই। ইঁ হাঃ য়ক্য়াসাক্ খাজনা-ট্যাক্স বাথাগই তংন’। নক আনি অর’ হলই রদি, বারাই খাইয়ই চাইতকমা খাইথায় আঙ অবন’ সিঅ।

 

মাতর সাবধান, কক খুকসা বাখা লারুকদি, চিনি বিসিংঅ ফেনেনায়রক (শত্রু) হাপফাইজাক। বক মাখাং থুকুলুবয় তংগই চিনি বিসিংঅ তকলাইর’নি নাইঅ। বাঙ্গালী-অবাঙ্গালী, হিন্দু-মুসলমান জত্ত চুঙ তাখুক বাকসাসে।  বকন’ জত্তন’ মাথাংজাকনায় (রক্ষা) চিনি সামুং য়াকমাসে (দায়িত্ব)।

 

রেডিও, টেলিভিশন আখায় পেপার-রগ’ চিনি জাঙগিরিঙমানি ককতুমা (খবর) সায়াখায় কাইঃসা রেডিও-টেলিভিশনঅ তা-থাংদি।
কাচাংততক খাইয়ই (শান্তিপূর্ণভাবে) বথল সিরুকমানখায় (সমাধান হলে) তাখুক-বুখুক অংগই তংমানথতক; আয়াখায় তংমানগালাক। এসোক তা-লুউয়াইনদি, মাখাং গানায় নাইলাইমানগালাক।

 

নক জুগাললাইয়ই তংলাইদি; হিঙ অংগই পাইখায় চাঃগালাক। জাঙগিরিঙমা, থামচি ফুনুকমা খাইয়ই থাংদি। জাঙগিরিঙমা বুময় কালাইখায় বক চিনি সাকাগ’ চুপুরুপন’। সামুংসরদুক (শৃঙ্খলা) খাথেয়ই (বজায় রেখে) হেমলাইদি। সামুংসরদুক বিনাকা কাইসাঃ জাতি চাইতকমাগ’  কাপালায় অংজাকয়া।

 

আঙ হায়কগ’ জত্ত কামিঅ, মহল্লাগ’, ইউনিয়ন’ আওামীলীগনি খ্রকসুপবায় (নেতৃত্বে) চাইতকমা বুথু (সংগ্রাম কমিটি) চেংদি। য়াগ’ তাঁ তাঁ তং অব’বায় জুগাল্লাইয়ই তংদি। থুয় যখন রখা, থুয় আর’ রনায়। ইঁ হাঃনি বরকন’ ফিয়গই রনায়। নকফাঙসা চুঙন’ কুলুম রথং।

 

“তাবকনি চাইতকমুঙ ফিয়কমানি চাইতকমুঙ,
তাবকনি চাইতকমুঙ য়কমানি চাইতকমুঙ”
জয় বাংলা।“

ককসেজাকনায় সালমারি: ১-১৯ জুন ২০১৯ ইংরেজী বিসি

 

বিশেষ তথ্য:
জাতির পিতা ''বঙ্গবন্ধু শেখমুজিবুর রহমান'' এর ৭ই মার্চের ঐতিহাসিক ভাষণ বাংলায় প্রকাশিত হয়েছিল কালের কন্ঠ পত্রিকায় ২৪ নভেম্বর ২০১৭ ইং তারিখে। নিম্নে লিংক প্রদত্ত হল। https://www.kalerkantho.com/online/miscellaneous/2017/11/24/569631 সেই প্রকাশিত ভাষণের অবিকল রূপ ত্রিপুরাদের ভাষা ''কক বরক'' এ প্রকাশিত এটি।